معتقدات سورية

معتقدات سورية





* اذا انكسرت كاسة بيقولوا: انكسر الشر
(تقولوا الشر مخلوق من الزجاج )



* اذا مر حدا فوق الطفل ما بقا يطول

( انو اذا طفل صغير متسطّح ما بصير حدا يمر من فوقوا ليشششش لان ما بعود بيطول الولد بيطلع قصير؟؟!!! و متل ما بقول المتل فشخة حية ولا فشخة بنية )







* قص الاظافر بالليل مو منيح
(لا تسألو ليش ما بعرف ولا حدا بيعرف بس مو منيح و خلص )





مراششة الميه فراق*

(ما بصير حدا يرش رفيقو بالمي لانو بعدين بيتفرقوا اي شو عم يرشه بزيت كاز !! )







* للي بيفوت على بيت جديد بيفوت معه عرق اخضر و مقص و مصحف و يدخل بالرجل اليمين (واللي بيعمل غير هيك بيتحول لسعدان !! )




* اذا اجت الكندرة فوق الكندرة يعني رايحين مشوار
(طيب واذا اجت تحتها يعني راجعين من المشوار ؟؟!!)


* اذا زحف الولد او زقزقت العصافير معناها جايينا ضيوف


(وبهيك حالة لازم توقفوا ورى الباب لانهم بكونوا طالعين عالدرج )






*اذا طنت ادنك اليمين حدا عم يحكي عنا بالمنيح و اذا طنت اليسار معناها حدا عم يجيب سيرتنا بالعاطل
(واذا طنوا مع بعض معناتها طرشت عليك العوض)





* اذا رفت عيني اليمين بيكون جاينا خبر منيح
*اذا رفت عيني الشمال بيكون جاينا خبر مو منيح
(اما اذا رفوا سوى فأنت اكيد احول )



· اذا حكني حاجبي معناها بدنا نستقبل حدا جاي من السفر


*إذا حكني كفي اليمين معناها بدي أقبض مصاري
*و إذا حكني كفي اليسار معناها بدي أدفع مصاري

(اما اذا حكك شي تاني بقى فأنت أكيد جربان روح تحمم )




* و ما بصير الحمام بالليل
(طبعا شي بديهي لأن اكيد المي بتكون مقطوعة )




*و ما بينفع كب المي بالبلوعة بالليل من غير التسمية بالله و الاستعاذة أولا

· (يالطيف مشان ما يأذونا ولا نأذيهن )






*واذا شفت مقص مفتوح لازم فورا تسكرو
( لانو المقص الفاتح تمو بيعمل خناق )







*وإذا عمل العصفور تحتو على الأواعي يعني جاييكون رزقة
(وما لازم تغسل ملابسك شي سنة مشان الرزقة )




*و دلق القهوة رزقة



(وكمان نفس الحكي خليها مدلوقة لا تمسحها )







*و اذا الولد الصغير كتير ابن الشهور عم يضحك لحالو بيقولو الملايكة بتكون عم تحاكيه
(بس ابصر شو بيكونوا عم يقولوا ؟؟؟!!! )







* كمان يلي حامل بصبي بتتباشع واذا حامل ببنت بتحلا
(طيب واذا كانت المخلوقة حامل بتوأم بنت وصبي ..شو بيصير فيها !!)



* وإذا الطفل قعد بالصينية وهي عالأرض بيرتعبوا لأنه هاد الولد رح يضيع



(ويمكن يتشرد هاد اذا ما طلع حرامي كمان )








* و كمان إذا حدا صبلك شاي او قهوة وملى الفنجان كتير بكون قلبوه مليان منك واذا صبها ناقصة هدا دليل على انو هالشخص ناقص

(يعني لازم الوحد يديرباله منيح وهو عم تصب القهوة والشاي..
منشان ما تزيد ولا تنقص شي ملي و ينفضح )




*واذا عندك ضيف اتقيل دم وبدك يروح من عندك على السريع شك دبووس او عدة دبابيس بأيد المقشة او اقرأ سورة الزلزلة
(بس اكيد في عالم اذا بتقرأ القرأن كله بيضلوا لزقة فلا تحاول )






*واذا خايف من عين اتصيبك جيب ورقة واكتب عليها اسم الشخص الي خايف من عينو وغزها بالدبوس وانت عم تقراء المعوذات وتقول من عين افلان و تنفخ...
(وفي حل تاني انك تروح تشيل عيونه وبلا وجعة هالراس )






*والي بيعدّ النجوم بيطلعلو تالولات بايدو
(بس اذا حسن يحصيهم ما بيطلع شي )






*وبعد ما نخلص صلاة نطوي السجادة مشان الشيطان ما يصلي عليها
(طيب خلّيه يصلّي بركدن يتوب ويصير يوسوسلنا بالخير )